“Gazel” redifli GAZEL

Zâhir ü bâtını ma'mûr u metîn olsa gazel
Sûrete yâver ü ma'nâya mu'în olsa gazel

İtse te'sîr dil-i sâmi'a hâh u nâ-hâh
Dil-nişîn sîne-nişîn sadr-nişîn olsa gazel

Yalınuz safha-i mecmû'alara olmasa kayd
Levha-i mihr ü mehe nakş-ı cebîn olsa gazel

Gûş iden seng-dil olursa bile itse eser
Mâ'il-i merteb[e]-i nakş-ı nigîn olsa gazel

Tohmdan hâsıl olan tâze şükûfe mânend
Nâzenîn-şekl ü hoş-âyende-zemîn olsa gazel

Girmese mahzen-i elfâzına düzdîde metâ'
Bender-i nâtıkada beyt-i emîn olsa gazel

Meh-ruhân-ı mütenâsib beden-âsâ Nâbî
Olsa hem-vâre ne gass ü ne semîn olsa gazel


***
GAZEL

Bezm-i safâya sâgar-ı sahbâ gelür gider
Gûyâ ki cezr ü medd ile deryâ gelür gider

Açıldığın haber verir ağyara gül gibi
Dâim bize nesîm-i sebük-pâ gelür gider

Olmaz yine marîz-i mahabbet şifâ-pezîr
Rûy-i zemine bir dahi Îsâ gelür gider

Sultân-ı gam nişîmen idelden derûnumu
Sahrâ-yi kalbe leşker-i sevda gelür gider

Bir gün demez o şûh ki âyâ muradı ne
Çokdan bu kûya Nâbi-i şeydâ gelür gider